دکتر غلامرضا رحماني شستون "آ مزنين انسان "
دکتر غلامرضا ۱۳۱۰ سال مه سراوان وديگ بوت.آهي وتي اولي ششين(۶) اسکولي سالانا سراواني تها ونت و مه زاهداني "۱۵ بهمن" دبيرستانا وتي علمي (رشته علمي) ديپلما سرجم کرت.رندا آ سوبين بوت که مه تهراني زانتجاها(دانشگاه) رشته پزشکي (جاندراهي) داخله به رسيت.
دکتري پتي نام نورمحمد ات و ماتي نامي بي بي بختي. واجه نورمحمد يک زهمت کشين مردمي بوتگ و آهي يک مدرسه اي "پراشک" بزان چوکيدار بوتگ.آهي چوکان سه مردين زهگ و يک جنين زهگي ات.
مهندس عليرضا رحماني شستان يکي چه دکتري براتان ات که آمريکاي تها وتي مهندسي گپت.رند چه ايراني انقلاب مهندس هم بازين بلوچين ورناياني پيما گون ايراني سوسياليستي حزباني گونا هور بوت و يکي چه سازمان "پيکار" اصلي باسکان زانگ بوت.مهندس مه ايراني اوليگين "مجلس"ي گيچينکاري دورا کانديد بيت بله سوبين نه بيت.
مه تيرماه ۱۳۶۰ تهرانا هور گون ۲۵۰ سرشناسين ايراني سياسي جهدکار په درور "سعيد سلطانپور" و"محسن فاضل" دستگر بنت و رندا اعدام کنگ بيت.
مهندس و آهي سنگتاني اعدامي مزنين پروشي په ايراني سوسياليستي حزب و پارتيان بوت. مزنين بهري چه ايراني مردم سياسي، غير سياسي، کارگر و زهمتکش، فن کار و هنرکار چه اشاني کشگا نگيگ و پريشان بوت انت و انچوش ايراني نميرانين سياسي گوشنده "فريدون فرخزاد " مه وتي نامدارين سوت "۲۳ نفر " شهيد عليرضا رحماني و آهي ۲۲ شهيد بوتگين همراهاني ياتا کنت
واجه غلامرضا رند چه چنت سال زهمت و مهنت وتي دکتري مدرکا (تخصص جراحي استخان) مه تهراني دانشگاها سر جم کنت و ئودان مه " ابن سينائي مريض جاه " وتي دکتري کارا بنگيج کنت.
رندا کرج و شاهرودي " شير و خورشيدي مريض جاهاني" سروک کنگ بيت.
دکتر سکين مهربانين و انساندوستين مردمي بوتگ و اگن يک بلوچي سر آهي مريض جاهي تها بکپتين گولا آهي گون وتي درستين واک و توان وتي بلوچين برات يا گوهارا کمکي کرت.آهي واهگ مدام همي بوتگ که محتاجين انساناني واسته کاري بکنت.هي خاترا " آمريکا و ويتنامي جنگ" ي وهدا هور گون ايراني " صليب سرخ " ديم په ويتنام روت و ۶ ماه ئودان زخمي بوتگين مردمانا کمک کنت.
دکتر رند چه وييتنام ديم په بلوچستان کئيت و وتي هذمتا په وتي بزگين کوم شروع کنت.زاهداني "کورش"ي مريض جاهي ذمه واري زوريت.
بازين سالاني وتي کومي کرا داريت.آهيا هچ پيمين تماهي چه وتي کوم نه بيت.شپ و روچ گريب و بزگاني علاجا کنت.گون وتي بيماران سک باز مهرباني کنت.دکتر اگن به ديستين که آهي بيمارا زرّ نيست گدا آهيا بي زرّ علاجي کرت وچه وتي کيسگ پر آهي دوا زورتي و زرّي گونا آهي کمک کرت.
من گون دکترا هچبر ملاقات نبوتگان ، بله آهي ستا و تاريپ من چه هما چوکي دورا اشکوتگ.
گون نازهکين مهندسي کوشگا دکتري سرّين پروشيت.اي چيز هور گون دکتري کومدوستي ، گريبدوستي ،انساندوستي و دکتري روشن خيالي سوب بنت که گيشتر آهيا ايراني تها جاهي مه بيت.
آ دگه بازين ايراني روشن خيالاني پيما درپدر بوت و ديم په پاکستان شت.
کراچي مه "جاتوئي هاسپيتال" پدا گون وتي دکتري کار کومي واسته هذمت کنت.بازين بيماري که چه مغربي باوچستان په علاج ديم په کراچي آتک انت ، بزان آ يک دابي دکتر صاحبا وديگ کرت.دکتر هم گون وتي پهکين واک آهاني علاجا بي هچ تماهي کرتي.يک بهر چه آهي لوگ پوره يک مريض جاه و دگه بهري پوره يک هتلي دا با بوتگ.شپ و روچ وتي بيماراني علاجي گونا دست گولايش بيت.
دکتر رحماني وتي دکتري تها استاد بوتگ ومدام آهي استادي و آهي نام مه ايراني ور ورين (مختلف)تاکان پيش دارگ و يارگ بوتگ.
اوليگين انساني "جنسي بدلي اپراشون" ايراني تها دکت رحماني گونا کنگ بوت.يکي دگه چه دکتر رحماني پزشکي کاران که ايراني جاندراهي علمي چه وتي جاها سرينت ايشي ات که آ کامياب بوت که يک ۱۳ سالگين نادراهين جنکي لاپا جراحي به کنت و۱۳ کيلوي غده اي که آهي لاپي تها بوتگ په سلامتي دربکنت.
مه وتي آوارگي و درپدري وهد دکتر چنت سالي مه لندن گوازينت.آهي کم وگيش لندني لهتيي مريض جاهاني تها چون که "کروم ول هاسپيتال"ي تها کار کرت ،بله آهي اصلي کار مه "بي بي سي" فارسي بهر اشکنوکاني جاندراهي جستاني پسو دات و په دکتر سراواني نام زانگ بوت.
دکتر رند چه دراجين وهدي درپدري پدا بلوچستان واتر بوت و مه زاهدان و چهبار وتي کار و هذمتا ديما برت.
دکترغلام رضا رحماني اي مزين انسان شنبه ۱ فبراري ۲۰۰۴ (۱۱ بهمن ۱۳۸۲)مه تهرانا اي جهان يله دات.واجهي بيراني سوب "لانگ کنسر" بزان "پپي سرطان" ات.اپسوزانت که دکتر رند چه عمل جراحي په سار نه آتک ، گريب و بزگ ،وتي سياد و عزيز و مردم و کوما سوگگ کرت.
روحي شات بات و ياتي زندگ بات.
راديو بلوچي اف ام
۳ فبراري ۲۰۰۴ استکهلم-سوئد |
