اول ماه مه "کارگراني جهاني روچ" دگنياي دورستين کارگرا نا مبارک بات.
اول ماه مه بزان ماه مئي اوليگين روچ ،کارگر و مزگراني جهاني روچ گون بشارتي يهت و سر بوت.مه اي مزنين روچ دگنياي تکريبا پعهکين فکتوري و کارخانه ان بند کنگ بنت و سجعين کارگران بازاران و روداني تها مچ بنت راهپيمائي و هرتال و جشن و شادماني کرتني گونا وتي تپاکي و يکدليا سرمايه و سرمايه داري سيستما پيش دارنت.
گيش چه يک کرن (قرن) پيش مه انچوشين روچي شيکاگوي شهري کارگران اي لوت بزان "روچي هشت کار"ي خاطرا تظاهراتا لگت انت.و اگن مروچي گندين که اي چيز منگ و کانوني ورا دراتکه و پرولتاريا ته بازين لحاظا کامياب بوته و يا مه بازين ملکان آهان مزن مزنين سوب چست کرتگ بزان که اي دورو همي زحمتکشين تکي (طبقه اي) مدامئين هيدريچي و جد و جهد و کار و مبارزاتي سوب انت.
بله اپسوز گندين که ايراني تها کارگراني اي منتگين حکوک لپاشگ بنت که هچ بلکن هر دمانا آهان دهشتگردي و لت و پلي آماچ بنت و هر ورين سکي وسزا آهاني واسته جوداينگ بيت.
واجه علي کشتگر (کارشناس امور ايران) راديو فرداي گونا گوشيت: " ايراني تها کارگري تنظيم (تشکل کارگري)يک دولتي تشکلي واگن کسي به لوتي يک کارگري هرتال (اعتصاب کارگري) بند و بست بکنت گدا بزان گون قاتلان و مردم کشاني که وتارا قاضي گوشنت ديم په ديم انت.
ملکي اکتسادي سلين جاور ،تورمي برزي (اينفلاشن) ، سوب بوتگ که مزدوراني(کارگراني) مزي ارزشت جهل به مانيت. بله پدا هن روچ په روچ بازين مزدوري چه همي وتي کم مزئين کارا کشگ به بنت.-بيکاري و بيروزگاري ملکي تها انچوش برزانت که مهلوک رضاانت گون همين کمين مزا هن کار به کنت.
وهدي ايراني ايدگه شهراني کار و کارگراني جاور اي داب انت گدا واجه خدا وت بلوچستاني کارگراني واسته خير به کنت.
چنت روچ پيسرا تلفني سرا گون يک وانندئين ورناي که بلوچستاني تها کاري رنداانت هبراتون....من جست گپت که بلوچستاني کاري جاور چون انت! آهي گوشت اگن يک دولتي کاري موجود به بيت ،بائدانت اول سر مردم ۲۰۰۰۰ تومن سرکاري حسابا(بانک) به ريچيت رندا توانت په آ کار تقاضا (اپلاي) به کنت و بلکن گيش چه هزار نفر همي يکين کاري خاطرا کاگد(تقاضا) راه به دنت. دولت هن رندا يک غير بلوچين مردمي چه اي هزارين مردمان گيچين کنت.
بلکن گيش چه ۹۰% چه بلوچستاني کارگران وتي حک و حکوکي باروا سرپدنه انت.دولت و کارخانه اي کار مستران چه اي چيزا شري سرا استفادگ زورانت .ور ورين رپک وسياست ا ي نادانين مزبگيراني سرا الاين انت.
په مثال "بافت بلوچ"ي تها دولت چنت سالا پيش يک "کميته انظباتي" اد کرت که کارگراني سرا چاروگي به کنت آهاني خيالات و کار و کردارا چير چم به داريت.آ بهر چه مزبگيران که چه اي کميته اي نيمگا گيچين کنگ بوت انت و په حکومتي کار مسترا گزارش کنگ بوت انت بزان رندا په نيمونيا چه کارا کشگ بوت انت.
کارگري حک انت که رند چه شش ماه کار کرتن رسمي کنگ به بيت، بله پيسر چه اي که آهاني شش ماه به رسيت چه وتي کاران کشگ بنت.و يا چه هما اولا "کار موقتي قرارداد" بزان سه يا چا ماهي قرارداد آهاني بندگ بيت.
بلوچستاني کارگراني مز خاص بافت بلوچي کار گراني مز انچوش جهل انت که اگن آ سه گشت هم گيش کنگ به بيت بله پدا هن آهاني زندي خرج و درجاني واسته بس نه بيت.دولت اي چيزا وش سرپدانت که آ سک زري محتاج انت.همي درگتا آ بازيني چه بافت بلوچي مزبگيرانا گون کمين زري ديگا " زر خريد " گرتگ وآهاني کاري پچ گپتگ .اي داب مزنين بهري چه بافت بلو چي بزگ و سادگ و زحمتکشين کارگرانا مه بي روزگاري وبي کاري چت و پوجگلان دور داتگ.
مسعود-ا
استکهلم-سوئد
۲۰۰۴-۰۵-۰۱ |
